6月28日，周四，懵懵请假一日去办证，办咩证？失业证！搞笑哦，在职人士办失业证……冇办法，因为Fesco话要办劳动手册首先要我本失业证，我冇就冇办法办招工，冇办法，只好去咯。但系办失业证首先又要有档案，因为太长时间冇去调档，所以懵懵嘅学生档案就咁就系南方摆足4年，终于因为要办劳动手册而要解放佢令佢重见天日……

    早上先去晒相，数码相果然厉害，即晒即取，费时不到5分钟，非常方便，15蚊有8张小一寸。

    跟住就去Fesco拎调档函。调档函Fesco早就印好，只要写上取档人姓名就OK，所以都好快，然后心谂去到南方取档就OK啦，结果去到先发现南方地址系天河路104号，但系档案管理个边话我知系天河路198号，奇怪啦，于是向前行啦，结果终于系苏宁电器旁边发现咗198号，上去7楼交身份证、调档函、报到证去查档，然后交管理费，4年管理费竟然收我￥890……心痛啊！！！交咗钱以为就可以取档走人，点知佢竟然比份函我又要我走翻转头去104号南方取档，呕血……

    去到南方随便揾个办事员帮手将份档案抄出来，因为尘封已久，所以揾咗好耐终于搞掂——时间已经到咗12点，好，午饭。

    下午过去办失业证。之前要去居委办，好在我醒目早上先打咗个电话过去，佢竟然话依家已经唔系系佢地个度办，要我直接去海珠北嘅劳动中心，于是走过去啦，左揾右揾发现间野竟然系二楼，收得真系密实～结果过去办证首先要填两份Form，前后面都要填满，然后交两张相、身份证、户口簿、档案，办事员重同我讲：哇，你啱毕业啊？你个系学生档案来个啵！ 边个叫我一毕业就去旅行社做啊，一直都冇提档案出来……搞掂之后拎咗份通知书，叫我下个星期五过去中山四听课领失业证，但系通知上面有标注“带身份证、回执、《计划生育服务证》或居委计生证明”去领失业证， 我都未结婚，边有计生证明哦！我问办事员点算，佢话，咁就拎《未婚证》都得，我话：我都冇哦！咁办事员就话：去居委办咯！结果，又要走过去居委……

    翻去户口地址嘅居委，揾咗好耐先揾到，结果得翻一个人系居委做野，其他人全部去晒扫街，偏偏留低呢个乜都唔知点搞，又晕……

    讲咗好耐，终于理清所有头绪，佢又比咗两张Form我填，填好又系睇我户口簿，然后上网查资料，跟住帮我系Form上盖章，满以为咁就得啦，结果佢叫我拎住两张Form去中山四领未婚证，天哪！！！！咁烦架！！！！

    赶过去中山四递表领未婚证啦，结果办事员竟然话：佢地居委都未盖居委公章！ 晕，莫非要我再翻去一次？好在啲人好话为，就咁就帮我办，唔系就惨咯。终于领到未婚证，咁就到落班时间，咁就已经跑咗一日，真系……无语。

    经过自己亲身经历跑一次办证，终于了解到中国嘅办证制度落后，我咁样跑一日办证已经系处处绿灯非常顺利，只系手续复杂，你话如果中间某个地方卡住，咁就烦咯……我就系档案管理中心见到有个男仔要调档但系冇带够钱，要打电话四处问亲戚朋友借钱嘅，你话咁死未！